കടന്നു പോയ അരികുകളില്‍
ആരൊക്കെയോ ഉണ്ടായിരുന്നു...
ചിലര്‍ ഭ്രമാത്മകമായി
നടന്നു നീങ്ങുന്നു...
കണ്ടിട്ടും കാണാത്തവര്‍..
കണ്ണ് തിരുമ്മി നോക്കുന്നവര്‍..
ഒരു രാത്രി ചാറ്റല്‍ മഴയത്ത്
നനഞ്ഞിറങ്ങിയ സ്വപ്‌നങ്ങള്‍...
ഈ വഴിയിറക്കത്തിന്റെ പാതിയില്‍
തിരിഞ്ഞു നോക്കി
കടം കൊണ്ട പ്രണയം
വഴികളറിയാതെ ആരെയോ കാത്ത്...
ആട്ടിയകറ്റിയിട്ടും
അരിച്ചരിച്ചിറങ്ങുന്ന നിശബ്ദതകള്‍...
ചുറ്റും വഴികളാണ് എന്നിട്ടും
എന്നിട്ടും ഹൃദയം പൊള്ളി ചിലര്‍...
പുറമ്പോക്കിലെ
നിസ്സഹായതയുടെ ചവറ്റു കുട്ടയില്‍
ചീഞ്ഞളിയുന്ന ജന്മങ്ങളെ
പുച്ഛം പിടിച്ച കണ്ണ് കൊണ്ട് നോക്കി
നീട്ടിത്തുപ്പുന്നതിനിടയില്‍
ആലോചിച്ചിട്ടുണ്ടോ
വീട്ടിലേക്കുള്ള വഴികളെക്കുറിച്ച്..?
